Jadeed Aaqleet Pasandi Ka Tanazur

2010-12-15T21:14:00.001-08:00

ڈاکٹر شمیم حیدر ترمذی

جدیدعقلیت پسندی کا تناظر ۔۔۔۔۔۔ایک تا ثر

جناب ابوتراب ؑ کا قول ہے ۔

"کتاب اہلِ علم کا باغ ہے۔ مطالعہ اس کی سیر ہے اور حکمت اس کے گل ہائے خوش بو ہیں" کتاب " جدید عقلیت پسندی کا تناظر " بھی دراصل فلسفے کی زمین پر، تین چار باغبانوں کا محنت سے اُگایا اور سجایاہوا گلستان ہے جس کی سیر سے میرا ذہن ،عقل ،علم اور حکمت کے پھولوں کی مہک سے مُشّین ہوا۔اس کتاب کے مطالعے کے بعد ،کچھ دیر ہی کے لیے سہی ،مجھے لگا کہ میں یک دم عاقل،دانااور عالم ہوگیا ہوں ۔پھر حضرت لقمانؑ کے قول نے بھی میرے اس عارضی احساسِ برتری کو سہارا دیا کہ" عالم وہ ہے جو دوسروں کے علم کے ذریعے اپنے علم کو بڑھاتا ہے۔ " یقین کیجیے کہ اس کتاب نے میرے علم میں اضافہ کیا اور میرے ذہن کو ایک نئی فکر سے آشنا کیا ہے۔

اس کتاب کی بنیاد پروفیسر مصدق شاہ کے جدید عقلیت پسندی سے متعلق لیکچر " ذہانت،علم اور تربیت " پر ہے۔ پروفیسر امجد علی شاکر،مطاہر ترمذی ،ڈاکٹر اسلم ضیاء اور انجینئر مزمل حسین کے دس بارہ مضامین اسی ایک لیکچر سے متعلق اور مربوط ہیں ۔ان تحریروں کے مطالعے سے تین باتیں سامنے آئی ہیں ۔پہلی یہ ہے کہ سبھی مضمون نگاروں نے لیکچر کے کچھ اجزا پر مکمل طور پر اتفاق کیا ہے۔ بالکل ایسے ہی جیسے اچھے مرید ،پیر و مرشد کے ارشادات پر آمنا و صدقنا کہتے ہیں۔

دوسرا نکتہ یہ کہ ان مصنفین نے لیکچر کے چند ادق و پیچیدہ نکات و اصطلاحات کی صراحت اس طرح کردی ہے کہ فلسفہ کے طلبہ و اساتذہ کے علاوہ عام قارئین تک بھی شاہ جی کی بات پہنچ جائے ۔ میرے نزدیک عالم دوستوں کا یہ اقدام قابلِ تحسین ہے۔ ظاہر ہے کہ پروفیسر مصدق شاہ نے لیکچر دیتے ہوئے محدود وقت کی وجہ سے اجمال سے کام لیا ہوگا ۔نیز انہوں نے یوتھ فورم پاکستان ،کے اجلاس کے سامعین کے علمی مرتبے اور فکری قد کے پیشِ نظر بعض باتوں کی صراحت کو غیر ضروری سمجھا ہوگا لیکن لیکچر کو کتابی شکل میں لایا گیا تو لازم تھا کہ عام قاری کے لیے ابلاغ کی الجھنوں کو دور کیا جاتا اور یہ کام مصنفین نے حتیٰ المقدور کردیا ۔

تیسری اہم بات یہ کہ لیکچر کی دوایک خامیوں کی طرف اشارہ ملتا ہے۔ لیکن دبے دبے الفاظ میں ،بڑے ہی ملائم اور شائستہ انداز میں اس طرح کہ مرشد کی دستارِ فضیلت اور عزتِ سادات پر بھی حرف نہ آئے ۔

کتاب میں شامل مضمون نگاروں نے پروفیسر مصدق شاہ کے لیکچر کے درج ذیل پانچ نکات کو مِن و عن تسلیم کیا ہے۔

۱۔ سائنس ،علم،حقیقت اور مماثل اور متبادل ہیں ۔

۲۔عقل(فہم) کو بروئے کار لائیں تو چار حقیقتیں سامنے آتی ہیں ۔

مظہریت ،مدرکہ،حقیقی اور مطلقہ۔۔۔۔۔۔(پروفیسر مصدق شاہ نے چار کا ذکر کیا ہے۔ لیکن تبصرہ نگاروں نے آخری دو کو ایک قرار دیتے ہوئے اُسے حقیقت الحقیقہ ہی کہا ہے۔)

۳۔ اب تک جتنے نظامات پیش ہوئے ،اُن کی بنیاد مظہریت یا ادراکیت ہی رہی ۔

جب تک حقیقت الحقیقہ کی دریافت نہ کی جائے، کوءی نظام کامیابی سے ہم کنار نہیں ہوسکتا۔

۴۔حقیقتِ حقیقی یا حقیقت ِ مطلقہ تک پہنچنے کے دس اصول یا ستون ہیں۔

(i) Axioms of Math’s.

(ii) Maxims of Equity.

(iii) Science of Probability.

(iv) Science of Validity.

(v) Genetics.

(vi) Evolution.

(vii) Classification of Creatures.

(viii) Ecology.

(ix) Psychology

(x) Synchronization.

۵۔ ہر شعبے (معاشرتی ،معاشی،اخلاقی، سیاسی) کے ماہرین کو چاہیے کہ وہ اس ریاضیاتی طریقہ کار کو اپناتے ہوئے حقیقت ِ مطلقہ تک پہنچنے کی کوشش کریں۔

تبصرہ نگاروں نے دوسرا اہم کام یہ کیا ہے کہ پروفیسر مصدق شاہ کے لیکچر کو فلسفی قارئین سے عام قارئین کی طرف لانے کے لیے مشکل باتون کو آسان پیرائے میں پیش کردیا ہے۔ اس صراحت اور وضاحت سے لیکچر کی علمی افادیت بڑھ گئی ہے اور اس کتاب کے لکھنے کا جواز بھی سامنے آگیا ہے۔ پروفیسر مصدق شاہ نے اپنے لیکچر میں مفروضہ ،نظریہ ،قانون ،اصول،

، اور ایسے دوسرےالفاظ و اصطلاحات کا استعمال کیا اور اُن سے نتائج اخذ کیے ہیں۔لیکچر پر تبصرہ کرنے والے عالم Validity ، امکانات،Axioms دوستوں نے عام قاری کی تفہیم کے لیے ان میں سے بیشتر اصطلاحات کی ، اپنے اپنے انداز میں مختصراً وضاحت کردی ہے جو میرے نزدیک اہم تھی۔ یہاں صرف چند منتخب مثالیں دی جارہی ہیں

مفروضہ امکانات سے نکلتا ہے۔ کارآمد مفروضہ عقلی بنیادوں پر قائم ہوتا ہے اور مفروضہ کی تصدیق ہونے پر وہ حقانیت کی منزل کو پاتا ہے۔ حقائق کی پختگی اور تنظیم سے نظریہ وجود میں آتاہے۔ صحت مند نظریہ بلا تردید پایۂ ثبوت تک پہنچ جانے کی صورت میں اصول بن جاتا ہے، (ص ۸۲ ،ص۸۶ ،مطاہر ترمذی)

وہ بنیادی اصول ہے جنہیں استخراجی طور پر ثابت کیے بغیر تسلیم کرنا پڑتا ہے کیونکہ سائنسی علم کی بنیاد ہی یہی حقائق ہیں ۔یہ اولین اصول Axioms خود اپنا اصول آپ ہے۔

جدید ریشفلزم کے مطابق علم کے پانچ دائرے ہیں۔پہلا دائرہ میٹا فزیکل سائنس کا جو بعید ترین امکانات سے تعلق رکھتا ہے۔ اس دائرے میں موجود امکانات کو ابھی تجربات اور مشاہدات کے مراحل سے گزرنا ہوتا ہے۔دوسرا دائرہ علم کے ان امکانات پر مشتمل ہے جو بعید تر ہیں۔تیسرا دائرہ مفروضات کا دائرہ ہے۔ یہ بعید امکانات کا دائرہ ہے۔ چوتھا دائرہ نظریات یعنی تھیوریز کاہے جس میں امکانات کے درست ہونے کے زیادہ چانس ہیں اور پانچواں دائرہ قوانین کا دائرہ ہے جو ان امکانات پر مشتمل ہے جو ہر طرح کے تجربات اور اصول و قواعد پر پورا اترتے ہیں(ص۱۷۵ انجینئر مزمل حسین)

حصول علم کی بنیاد مشاہدہ پر قائم ہے۔ سادہ مشاہدہ حقیقت نہ ہو کے باوجود حقیقت کی دریافت کے لیے رہنمائی کرتا ہے۔ سادہ مشاہدے سے حاصل ہونے والی حقیقت مظہرکہلاتی ہے ۔ادراک صرف محسوسات کی حدود میں حاصل ہوتا ہے۔ جبکہ موجودات ،محسوسات کے دائرہ سے بالاتر بھی ہے۔ حقیقت مدرکہ کی دریافت بھی حقیقت کی دریافت نہیں ہے۔امکانات کو جمع کرلیا جائے تو ایک امکان ایسا بھی ہوگا جو حقیقت ہوگا۔کون سا امکان حقیقت (الحقیقہ) ہوگا؟ اس کے حل کے لیے پروفیسر مصدق شاہ نے عقل کو کلیدی حیثیت دی ہےاور جدید عقلیت پسندی کے نظریہ کے دس ستون بتائے ہیں(ص ۹۶۔۹۸ ڈاکٹر اسلم ضیاء )

پروفیسر مصدق شاہ کے پیش کردہ جدیدریشفلزم کے ذریعے حقیقت الحقیقہ تک پہنچا جاسکتا ہے ۔ اس کے مطابق ہم حتمی سچائی تک اسی صورت میں پہنچ سکتےہیں جب ہم تحقیقی عمل کے دوران ،عقل کے درج ذیل تمام ذرائع کو بروئے کار لائیں ۔

(i) Science of Probability

(ii) Science of Axiomology

(iii) Science of Maximology

(iv) Science of Validity

(ص ۱۷۲۔ ۱۷۳ مزمل حسین)

وہ امکانات جو سائنس آف ویلڈیٹی کے کسی پرنسپل سے نہ ٹکرا رہے ہوں اور نہ ہی واضح طور پر ثابت ہورہے ہوں وہ نظریات ہوں گے ۔ایسا نظریہ جو سائنس آف ویلڈیٹی کی تکنیک کے ذریعے ثابت ہوجائے وہ قانون بن جاتا ہے۔ویلڈیٹی کے اصول اگر کسی امکان کو ثابت بھی نہیں کرتے اور ٹکرا بھی نہیں رہے تو وہ نظریہ ہے اور اگر ٹکرا رہے ہیں تو وہ مفروضہ ہے ۔وہ امکانات جو مییمس( ) سے ٹکرا رہے ہوں سائنس فکشن ہے اور جواینیمس( ) سے ٹکرا رہے ہوں وہ میٹافزیکل سائنس ہے(ڈاکٹر اسلم ضیاء ،ص ۱۴۹ )

پروفیسر مصدق شاہ فلسفی ہے وہ فلسفے کی اصطلاحوں میں سوچتا ہے۔اس کا کہنا ہے کہ ایک مظہریت ہے،ایک حقیقتِ مدرکہ ہے،ایک حقیقتِ حقیقی ہے اور ایک حقیقتِ مطلقہ ہے۔ مغرب حقیقتِ مدرکہ تک پہنچ پایا ہے ۔حقیقت الحقیقہ اور حقیقتِ مطلقہ سے محروم ہے۔ ۔۔۔۔ اصل مسئلہ نظام نافذ کرنے کا نہیں ،حقیقتِ حقیقی کی دریافت کا ہے۔۔۔۔۔۔اس نے اس حقیقت تک پہنچنے کا راز بھی نہیں بتایا ہے۔ ۔۔۔۔آج عقلیت پسند سائنس کی الجھنیں سلجھا رہے ہیں اور اس حقیقت الحقیقہ تک لے جانے کے لیے پرفیکشن کی منزل دِکھا رہے ہیں( ص۱۳ ۔۲۰ امجد علی شاکر)

ان تبصروں سے صاف پتا چلتا ہے کہ تبصرہ نگار پروفیسر مصدق شاہ کی ثقاہت اور فلسفہ دانی کے معترف ہیں اور یہ بھی کہ انہوں نے اپنے لیکچرمیں علم و حکمت کے نئے

کی تشکیل کا ہفت خواں طے کیا ہے۔ سبھی نے تائید کی ہے کہ ان کے دئیے ہوئے جدید عقلیت پسندی کے ستونوں Paradigms

پر حقیقتِ مطلقہ کی عمارت تعمیر کی جاسکتی ہے۔ ہاں پوری کتاب میں ایک دو جگہ لیکچر پر Ten Pillars of Modern Rationalism

اعتراض نہیں ،صرف

ریکارڈ کرائے گئے ہیں جو میرے نزدیک تنقیص نہیں ، تعمیر و تطہیر کے ذیل میں آتے ہیں : Observation

" ایک بات جو کھٹکتی ہے ،وہ یہ ہے کہ انگر یزی الفاظ و تراکیب کا بکثرت استعمال کیا گیا ہے۔شاید اس کی وجہ یہ ہے کہ مقرر نے انگریزی میں سوچا ،انگریزی میں پڑھا ۔۔۔۔(ص ۱۵۰ ڈاکٹر اسل ضیاء )

لیکچر میں مروجہ طریقہ ٔ تحقیق (مسئلے کا بیان ،شناخت ،تجزیہ ،امکانات کی تطہیر ،مسئلے کا بیان ) سے ہٹ کر ایک بالکل نیا طریقہ ٔ تحقیق پیش کیا گیا ہے۔ انہوں نے نئے اندازِ تحقیق کے اشارات تو دئیے ہیں مگر پُرانے طریقہ ہائے تحقیق کی حیثیت بیان نہیں کی ۔انہیں نہ ہی مسترد کیا اور نہ ہی اُن کے جواز کا کوئی عندیہ دیا۔(ص ۱۴۶ ڈاکٹر اسلم ضیاء)

اب تک میں نے آپ کو حدیثِ دیگراں سنائی ۔ایک فلسفی کے بارے میں فلسفیوں کی باتیں سنائیں ۔جی چاہتا ہے کہ ایک عام قاری اور طالب علم کی حیثیت سے لیکچر اور کتاب کے مواد کے بارے میں ،میں بھی کچھ کہوں۔ پہلے تو میں مصدق شاہ صاحب کے " چار یاروں " کی محنت اور دیانت کی داد دیتا ہوں جنہوں نے لیکچر کو ہر پہلو سے دیکھا اور اپنے علم کو لیکچر سے منسلک کرکے اس کتاب کے مواد کو دُر بنادیا۔انہوں نے ہمیں باور کروادیا کہ اچھی تقریر کا اندازہ اس کی لمبائی سے نہیں ،گہرائی سے ہوتا ہے۔ کتاب کے لفظ لفظ مطالعے سے مجھ پر کھلا کہ مصنفین نے مصدق شاہ کی ذات سے عقیدت اور ان کے لیکچر میں خاص دلچسپی کا اظہار پورے خلوص سے کیا اور اس قول پر عمل کیا۔ " خوشی کا راز یہ کہ جن چیزوں یا لوگوں سے تمہیں دلچسپی ہے ،ان سے متعلق اپنے ردِ عمل کو دوستانہ بناؤ "

پروفیسر مصدق شاہ کے لیکچر کی خاص بات یہ کہ ان کا "دس نکاتی " طریق کار علم اور زندگی کو خانوں میں رکھ کر نہیں دیکھتا ،ان کی عقلیت پسندی ڈومینز سے ماوریٰ ہے۔ ان کا سارا زور اس بات پر ہے کہ جدید عقلیت پسندی کے دس اصول ہمیں ہر قسم کی حقیقت اور ہر میدان میں حتمی سچائی تک پہنچاسکتے ہیں ، شرط یہ کہ شعبہ کے ماہرین حقیقتِ مطلقہ کو تلاش کریں اور عقل کو امام مان کر حقیقت تک پہنچنے کی کوشش " حق الیقین " کی نہج پر آکر کریں ۔نیوٹن اور ڈارون کی سائنسٹزم یعنی مادی سائنس کے قوانین کے ذریعے حتمی سچائی تک پہنچنے کی بجائے سائنسٹولوجی یعنی سوسائٹی کے قوانین میں حقیقتِ حقیقی کی جستجو کریں ۔امکانات کی منطقی اور نفسیاتی ترتیب کی راہ سے حقیقتِ مطلقہ تک پہنچیں ۔محتاط اور منظم عملِ تطہیر یا چھانٹی

کے وسیلے سے اصل حقیقت تک رسائی حاصل کریں۔(Synchronization)

پروفیسر مصدق شاہ کا دعویٰ ہے کہ ان مجوزہ طریقۂ تحقیق سے ہر شعبہ حیات کے ہر مسئلے کی حقیقت کا کھوج لگانا ممکن ہے ۔ان کے اس دعوے کی دلیل ہمیں کتاب میں شامل مضامین میں آسانی سے مل جاتی ہے۔

" جدید عقلیت پسندی " عقل کو معیار ِ حقیقت قرار دیتی ہے ۔افراد کے باہمی روابط یا عمرانی معاہدات میں حقیقت کو فوقیت حاصل ہوگی تو معاشرہ عقلیت پسند اخلاقی اقدار کا حامل ہوگا جو حتمی اور آفاقی ہونے کی وجہ سے ہر معاشرتی تنظیم میں رائج ہو کر معاشرے کا خاصا قرار پائیں گی۔۔۔۔ایسی معاشرتی تنظیمیں جو اپنے نظامات کو جدید عقلیت پسندی کی بنیادوں پر استوار کریں گی ،ان کی اخلاقی اقدار معاشرے کے تصور ِ حقیقت سے ہم آہنگ ہو کر تہذیبوں کی یکسانیت اور ہم آہنگی کا باعث ہوں گی۔ (ص۱۱۸ مطاہر ترمذی)

"معاشی نظام کو جدید عقلیت پسندی کے نظریہ کے تابع رکھنے سے جملہ شکایات کا ازالہ ،مسائل کا حل ، پیداوار میں اضافہ ،مناسب منافع اور معقول وسائل ِ آمدنی حاصل ہوں گے۔۔۔ایسا نظامِ معشیت مفادِ عامہ کو خصوصی اہمیت دیتا ہے اور متوازن تقسیمِ دولت کے اصول پر صحیح منصوبہ بندی کرکے استحصال سے پاک معاشرہ قائم کرتا ہے۔

(ص۱۳۷ مطاہر ترمذی)

" پروفیسر مصدق شاہ کے نزدیک حکمران عقل و حکمت رکھتا ہو تو اجتماعی عدل کے قیام کی صلاحیت پیدا ہوگی۔۔۔۔ جدید عقلیت پسندی مشورہ نظام ِ سیاست قائم کرکے معاشرتی مسائل کے حل کی ضمانت فراہم کرتی ہے اور عوام کو شریک اقتدار کرکے پورے معاشرے میں احساسِ فرض کی نمو کا باعث ہوتی ہے۔" (ص۱۴۲ مطاہر ترمذی)

" جدید ریشفلزم نے انسانوں کو ایک ریاضیاتی طریقہ دیا ہے۔ اس طریقہ کار کو استعمال کرتے ہوئے ،ماہرین اگر سیاسی ،معاشرتی اور معاشی نظام تشکیل دیں اور ان کے نفاذ کی عملی جدوجہد کریں تو ایسی دنیا دریافت ہوگی جس میں انسان مطمئن ہو کر ایک نئے انسان کی تعمیر کرسکے گا۔(ص۱۷۶ ،مزمل حسین)

کتاب کے مصنفین کے لیے تحسین کے الفاظ کہ انہوں نے نئی فکر سے مربوط مفید کتاب شائع کی اور پھر اُن کا شکریہ کہ انہوں نے مجھ ایسے کم علم بندے کو عالم فلسفی پروفیسر مصدق شاہ سے ملوایا اور ایسے ملوایا کہ میں بھی "ان دیکھے " شاہ جی کا مرید ہوگیا ۔خُدا " اہلِ کتاب " کو توفیق دے کہ وہ اس کتاب کا دوسرا ایڈیشن چھپائیں لیکن اس صورت میں جب۔

کمپوزنگ کی لا تعداد اغلاط کی تصحیح ہوجائے (i)

اپنے وسائل کو کام میں لا کر شاہ جی کے لیکچر کا مخدوف حصہ تلاش کرلیا جائے اور اس لیکچر کو پورا چھاپا جائے( اس طرح مصنفین علم اور عالم دونوں (ii)

سے عدل کرسکیں گے)

جدید عقلیت پسندی کے دس ستون(iii)

(Ten Pillars of Modern Rationalism)

جو لیکچر اور تمام کتابی مواد کے لیے مرکزی حیثیت اور ماسٹر ریفرینس کا درجہ رکھتے ہیں ان کی عملی صورت گری اور تفہیم کے لیے کسی بھی شعبہ سے کم از کم ایک مسئلہ ،قضیہ،عنصر لے کر اسے باقاعدہ مثال کے ذریعے تدریج و تسلسل کو قائم رکھتے ہوئے دس درجوں سے گزار کر حقیقت ِ مطلقہ تک پہنچایا جائے۔ یہ ایک مثال اور توضیح

مختلف شعبوں کے ماہرین کے لیے رہنما طریق کار بن جائے گی جس پر عمل کرکے وہ اپنے اپنے شعبے میں حتمی سچائی تک پہنچنے کا کام زیادہ اعتماد اور اعتبار کے ساتھ انجام دے سکیں گے۔

آخر میںاپنے بارے میں ایک بات مجھے آپ کی اجازت سے کرنا ہےکہ میں حسابی نہیں کتابی آدمی ہوں ۔میں نے ساری عمر دولت کی حرص اور طمع سے دامن بچا کر کتاب کا مطالعہ کیا ہے، کتاب سے استفادہ کیا ہے۔ عالموں کی باتوں کو غور سے سُنا ہے، علم کے موتیوں کو چُنا ہے اور پھر علمی خزانے کو دونوں ہاتھوں سے لُٹایا ہے۔تدریس کو ایک معیار اور تحریر کو ایک اعتبار دیا ہے۔ مجھے عالموں سے پیار ہے ۔میں حکمت کا قدردان ہوں ،مجھے علم سے ربطِ خاص ہے کہ یہ قیمتی شے مدینۃ العلم اور باب العلم کی امانت ہے۔ میں نے پروفیسر مصدق شاہ کی زبان سے لیکچر نہیں سُنا لیکن اس کتاب کو پڑھ کر ایسا لگا کہ میں پندرہ برس پہلے یوتھ فورم پاکستان کے اجلاس کے سامعین کے درمیان بیٹھا ہوں ۔ایک اچھے طالب علم کی طرح استاد مصدق شاہ کی زبانی حکمت کی باتیں سن رہاہوں اور صاحبِ نہج البلاغہ کی یہ بات میرے قلب و ذہن کو آسودہ کررہی ہے کہ " حکمت ایک درخت ہے جو دل میں اُگتا ہے ،دماغ میں پلتا ہے اور زبان پر پھل دیتا ہے۔ "

****

مینارِ پاکستان ( آوازِ دوست )از مختار مسعود

2010-01-23T20:36:00.000-08:00

مینارِ پاکستان ( آوازِ دوست )از مختار مسعود
یہ کتاب کا ایک حصہ ہے اگر آپ پوری کتاب پڑھنا چاھتے ہیں تو " کتابیات " پر تشریف لائیے۔
kitaabiyat.blogspot.com

Download

Umrao Jaan Ada By Mirza Haadi Ruswa

2009-12-06T08:35:00.000-08:00

Umrao Jaan Ada is a story of a Tawa'if (Dancing Girl); A tragic tale of innocent girl to whom time was not kind. How Umrao became Umrao Jaan Ada, a Tawa'if whom his brother refused to accept as sister when she came back to him after the long exile. This novel is basically a very vivid portrait of the declined culture of Lukhnow, the way it is written is the proof of why it became so popular as a novel in Urdu Literature.
In India and Pakistan many films were created based on the same novel and recently Geo Television Network also brodcasted a Drama Serial based on it.

Visit Kitaabiyat to Download This Book, Absolutely Free!

Open Urdu Study Centre For M. A Urdu

Urdu Sher Ki Dastaan By A Hameed

Dabistaan-e-Dehli & Dabistaan-e-Lakhnaw

Jadeed Aaqleet Pasandi Ka Tanazur

مینارِ پاکستان ( آوازِ دوست )از مختار مسعود

Urdu Ki Behtreen Masnavian By Dr. Farman Fatah Pori

Masnavi Sehar-ul-Bayan By Mir Hassan Dehelvi

Tef-e-Ghazal By Compiled Dr. Mumtaz Manglori

Muntkhib Ghazaliyat

Makhmas Shehar-e-Aashob By Mir Soda

Umrao Jaan Ada By Mirza Haadi Ruswa

Prem Chand K Muntakhib Afsanay Compiled By Dr. Ubaid-ul-Allah Khan

Nisab M. A Urdu

Sannata By Ahmed Nadeem Qasmi

Sannata By Ahmed Nadeem Qasmi

Urdu Nasr Ki Dastan By A. Hameed

Ramooz-e-Bekhudi By kokab Shadani

Israar-e-Khudi By Abdul-Radhid

Bazam-e-Khush Nafsan By Shahid Ahmad Dehlvi

Sketches

Bazam-e-Khush Nafsan By Shahid Ahmad Dehlvi

Visit Kitaabiyat to Download

Botiqa By Aziz Ahmad

Botiqa By Aziz Ahmad

Urdu Adab Main Romaanvi Tahreek

Urdu Adab Main Romaanvi Tahreek